Quand ‘m kmessa ma es xtudo, jam sabia uke era nha objetivo. Um kria pesquisa um linga, nha linga, kriol d’Barla Vento d’Cabo Verde. Um otxa e ainda um ta otxa q’tem falta de faze mas pesquisa sobra es linga, um linga ka ta isixti ainda tont temp, mais o mens 500 ôn. Es linga forma pe contact entre Portugues e Africano que esh tinha levod, de Africa interior, 500 kilometro d’esh ilha. Influencia Portugues tiv ainda tem sempr mas atençao na nos cultura e ne nos linga, es é consequensia d’xtoria e visao pmod uke é Europeu é mdjor, ta manda, é tem mas valor. Pmod ess, nô faxta e nô pintxa nos raiz Africano, que ma certeza tambem ta la, na nos cultura e ne nos linga.
Mas k certeza ja tem traboi d’linga Kriol d’Cabo Verde, mas sempr esh traboi li ta fala so de Kriol falôd na sul d’Cabo Verde, ma argumento que es li e mas Africano do que quel de Barla Vento, ma so um ta fala nha linga, um te uvi um linga q é diferent de Portugues na mesma. Es li pom te questiona txeu pergunta, manera es li pode ser mas Africano do q kel d’nos? So tem mas do q’2000 linga Africano! Ma kole linga Africano kel a ta ser kumparôd? Entom onde nos kriol ta fka? D’box d’Portugues? O d’bôx de kriol d’Sota Vento? Mim um ta otxa q’nao e por isso um tra possiblidad na nha these pa faze es pesquis pa cumpara kriol de Barla Vento ma Wolof.
Wolof e um linga falod ne Sengal, Gambia e sul d’Mauritania, na nha xtudo um tive possibilidade pa xtuda Wolof ne Sengal, entom Wolof que ‘m usa com esemplo e kel Wolof falod na Senegal. Pourque um xkuli Wolof? Simplixmente so pmod na mapa esh terra te fka mas pert de Cabo Verde. Na nha pesquisa ‘m foca na grammatica e pronunciament, pmod palavra ou morfologia e mas dixtraid d’Portugues e kela ja nô sabé. Na nha pesquis um otxa k certeza elemento na nos linga q’pode ser comparôd ma Wolof. Ma tambe um otxa, ums elemnto q’ka ta pode ser cumparod ma kriol Sota Vento, e ne ma Portugues, e tambe ne ma Wolof, es kre dze pmod ainda tem falta de mas pesquisa de nos linga. E ne esh pesquisa, tem que ser cumparod k mas linga Africana.
E porque outravez q’M ta foca ne esh linga Africana, pa muda es visao pmod esh linga ta vale mentx, o xtoria pmod es linga e ne linga, es e linga k certeza e q’tem um valor igual a kix linga d’Europa. E pa verdaderament decolonialisa nos mente, e tambe pe moxtra que nos linga kriol e um linga k tem valor de um linga. Linga d’nos kriol k no te expressa e differencia nos mes. E 46 ôn dpox d’independecia nô ta pode continua d’completa tud part d’nos, e ess tambe e kesh parte Africano ne nos jeito de ser kriol.
M krix comessa ma nos linga, mod es e um parte ek te xtod sempre ne nos meio dia a dia, nes for nascido na diaspora, e tambe k tem elemento kex te conta nôs parte d’nos historia sem no nota, esh parte no deve celebra, agora k no ta pode.
Em fim, moda na txeu terra Africana, tambe na nos linga d’poder colonial de pasod ainda e linga ek te tma sempr prioridad na vida proffesional. So no te faze mas pesquisa, so no te xkreve nos grammatica, so ne hora de xkreve politica esh ta leva linga local asser e so no te continua ta dxcubri raiz d’nox linga, M ta dseja que um dia nos linga ta ser um linga ek te pode tma um possisao passod infromalidade ne nos sociedade Cabo Verdiana!
Pa um Cabo Verde mdjor.